Á síðustu árum hafa stjörnufræðingar uppgötvað meira en 4000 reikistjörnur á braut um aðrar stjörnur. Þessi fjarlægu sólkerfi eru fjölbreytt: sum innihalda stóra gasrisa í líkingu við Júpíter meðan önnur skarta bergreikistjörnum á borð við Jörðina. Í tilefni af 100 ára afmæli Alþjóðasambands stjarnfræðinga (IAU), gefst almenningi tækifæri að leggja til nöfn á fjarlægum sólkerfum. Nöfn sem verða fyrir valinu munu verða viðurkennd í gagnabönkum IAU og notuð í stjarnvísindum til frambúðar.

Íslandi hefur verið úthlutað stjörnunni HD109246 í stjörnumerkinu Drekanum og fjarreikistjörnunni HD109246b á braut umhverfis hana. Við þurfum á hjálp þinni að halda til að finna nafn á bæði stjörnuna og fjarreikistjörnuna! Frestur til að senda inn tillögur er til 20. október kl 23:59 að íslenskum tíma. Að honum loknum mun landsnefnd rýna tillögurnar og velja 5 til 10 sem munu fara í úrslitakosningu. Almenn kosning mun vera opin frá 23. október til 14. nóvember. Alþjóðasambandið mun tilkynna formlega nöfnin um miðjan desember 2019. Sigurvegari mun fá tilkynningu í tölvupósti.

Tillögunni þarf að fylgja nafn, heimilisfang, aldur, tölvupóstfang og örfá orð um uppruna nafnanna. Sérstakt tillit verður tekið til hugmynda sem berast frá grunnskólum og þá er æskilegt að upplýsingar um bekk og umsjónarkennara að fylgi. Athugið að ákveðnar reglur gilda um nafngiftina og eingöngu einstaklingar með lögheimili á Íslandi mega senda inn tillögu.

Hafa ber í huga að tillagan þarf að samanstanda af tveimur nöfnum: einu fyrir stjörnuna og einu fyrir fjarreikistjörnuna. Þó hugmyndaflugið skuli ráða för þá er æskilegt er að nöfnin tvö vísi til sama uppruna eða hafi sama þema og hafi skírskotun í sögu, tungumál eða menningu. Samkvæmt IAU mega nöfnin ekki vera pólitísk, niðrandi, vísa til hernaðar, trúarbragða eða fyrirækja o.s.frv. Kynnið ykkur nafnareglur IAU.